മോഹ ഭാവങ്ങള്‍
വെറുതെ ഞാനോര്‍ത്തുപോയ് വെറുതെയാണെങ്കിലും
വെറുതെ മനസ്സിന്നു ശാന്തി നല്‍കാന്‍
വേറെന്തു ചൊല്ലുവാന്‍ വേദനിക്കുമ്പോഴും
വേറിട്ടൊരോര്‍മ്മക്കു മാറ്റുകൂട്ടാന്‍
വിരസമാണിന്നെന്റെ വീറുള്ള മോഹത്തിന്‍
വൈരുധ്യമാര്‍ന്നൊരാ വിജയഭാവം
ഒരു നിലാ വെട്ടത്തില്‍ അലയുന്ന പ്രാണന്റെ
കരുണക്കു നിഴലാവുമാര്‍ദ്രഭാവം
ഒരു പണം തൂക്കത്തിലലിയുന്ന മോഹമാം
നറുമണം വീശിപ്പരന്ന ഭാവം
നീറുന്ന മാനസം കത്തിജ്വലിക്കുന്ന
നീരിനെ തേടുന്ന പ്രാണ ഭാവം
തീരാത്തൊരല്ലലില്‍ തേടുന്ന വീധിയില്‍
തോരാത്തൊരശ്രുവിന്‍ ദീന ഭാവം
എവിടെയോ ഞാന്‍ കണ്ട മോഹപ്പരുന്തിന്റെ
അവതാര ലീല പോല്‍ തീര്‍ത്ത ഭാവം
എന്തിനോ ഞാന്‍ തീര്‍ത്ത വേഷപ്പൊലീമയില്‍
മുന്തി നില്‍ക്കുന്നൊരാ ധാര്‍ഷ്ട്യഭാവം
നാരായ വേരിന്റെ നീരിടം വറ്റിച്ച
നേരിന്നൊരന്ത്യമാം മൂഢഭാവം
ഭാവങ്ങളത്രയും വേര്‍തിരിച്ചെന്നാലും
ബാക്കിയാവുന്നൊരാ മോഹഭാവം
വെറുതെയാണെങ്കിലും എന്നും മനസ്സിലെ
ചെറുതെന്നു തോന്നുമാ യുക്തിഭാവം
എത്രനാള്‍ കാത്തിരുന്നെന്നാലുമാവില്ല
സത്യമെന്നൊരുമാത്രയെന്ന ഭാവം
എങ്കിലും ഞാനോര്‍ത്തു, നിറയുന്ന ഭാവത്തില്‍
എന്നും തുടിക്കട്ടെ, ശാന്തി നല്‍കാന്‍..
No comments:
Post a Comment